Пад шалямі

Злуе сабачы брэх:
Заела жытка злая.
Вавёрка дзьме арэх.
Хрумсьціць капустай заяц.

Кастрычніцкі запал
Пад першым лёдам глухне.
Празрысты ліст запаў
Бярэзьніку за вуха.
На зэльвенскі кірмаш
Габлюе клёпкі бондар:
Капейчыны нямаш,
А нос апух, як бонда.

Напеша напрасьцяк
Туман валочыць стому.
Падобна, халасьцяк
Папоўз з чужога дому.

Наперадзе ў брыдзе
Ня чорт грудзіну клычыць
І ў Бога ў барадзе
Сьлязу за дробязь лічыць!

На Шалях зорак шмат:
Любую бабу ўразіць!
Вось чарка. Сала шмат.
Жыву, ва ўсякім разе.