Кастрычнік...

Кастрычнік. Лета — на "вакацыі".
Ці на Мальдзівах, ці на Мальце.
А восень — майстра дэкарацыі —
ў тры змены з лісця аплікацыі
"артвыстаўляе" на асфальце.

Нястомна с промнікамі рыскае
ў бярозах, ясенях і клёнах —
і "дапрацоўвае" над рыскамі
іх "асвятлення" — і вятрыскамі
здзімае "лішкі" ў "асвятлёных".

Вальсуе з імі, карагодамі
паўсюды кружыць — бы гуляе
у даганялкі з іх "свабодаю"—
і, перамогшы, з асалодаю
пад ногі некаму шпурляе.

Дажджом чэканіць, таушыруе
і лепіць слотным суперклеем
да тратуараў...
І пазіруе:
з неадшукаўшым волю выраем
лістоты восеньскіх алеяў.